Centos de persoas percorren durante máis de tres horas a distancia entre Redondela e Vigo, na defensa do emprego e contra as políticas do PP que destrozan os sectores productivos do pais.
A marcha polo emprego convocada pola CIG rematou diante do edificio da Xunta en Vigo coa lectura dun manifesto por parte do secretario comarcal, Alberte Gonçalves, que cargou contra as políticas de precarización e miseria do capitalismo, así como contra o sindicalismo de concertación, reivindicando o modelo combativo e de clase da central nacionalista.
Salvada a distancia entre Redondela e Vigo nunha marcha a pé baixo unha choiva intermitente, o acto finalizou coa entrega no rexistro da institución autonómica dunha carta con oito puntos reivindicativos.
O percorrido a pé arrincou da Alameda e Redondela arredor das 10.00 horas e os participantes completaron os 14 quilómetros até Vigo en pouco máis de tres horas. Durante o traxecto, que incluíu unha breve parada no barrio de Teis para repoñer forzas, berráronse consignas como “Traballo digno na nosa terra”, “A loita é o único camiño” ou “Queremos traballar e non emigrar”.
Pouco antes das 13.30 horas a comitiva chegou ás inmediacións do edificio da Xunta na cidade, onde rematou a mobilización tras a lectura dun comunicado por parte do secretario comarcal da CIG, Alberto Gonçalves, que tamén fixo entrega dun escrito dirixido ao delegado autonómico no que se alerta sobre a situación laboral da bisbarra e se debullan as principais alternativas que propón a central para reactivar a creación de emprego e rematar coa precariedade.
O representante sindical explicou que o obxectiv da marcha é facer visíbel a "durísima realidade" que están a vivir milleiros de persoas por mor do brutal desemprego que azouta o noso país e singularmente a nosa comarca.
"Milleiros de familias que hoxe xa non teñen unha fonte de ingresos regular e que nalgúns casos xa están en risco real de exclusión social, de máxima pobreza", lembrou.
Así, denunciou que "continuamos a sufrir un elevadísimo nivel de desemprego, que na realidade atinxiría a preto de 80.000 persoas, moi por enriba das estatísticas oficiais, que falan de 60.000”. Ademais, advertiu que prosegue o esmorecemento das principais actividades produtivas (naval, automoción, construción, etc.), “que lonxe de se recuperaren avanzan cara a desertización industrial”.
En canto ás alternativas que propón a CIG, apostan pola creación dun plan de desenvolvemento industrial para a comarca; a aplicación da Lei do Sector Naval e a dotación dun plan galego para a industria da automoción; a recuperación integral da Ría de Vigo para potenciar a pesca e o marisqueo e o fin da exclusión da flota galega nos acordos da UE; a derrogación das reformas laborais, de negociación colectiva e das pensións.
Tamén propoñen a redución da xornada laboral cara as 35 horas semanais e limitación das horas extras; eliminación das ETT e da contratación temporal e parcial; aumento do salario mínimo interprofesional e creación dun salario de inserción laboral e social; e reactivación da negociación colectiva e avanzar cara a un Marco Galego de Relacións Laborais.
Comenta google+
Comenta Facebook